手術切除係大多數惡性腫瘤首選嘅治療方式。但如果個腫瘤好特殊，例如包住咗血管、侵犯神經、貼近重要組織、或者喺結構複雜嘅部位，無法動手術，咁又點算好？
以「癌王」——胰臟癌為例。由於胰臟位置深、解剖結構複雜，加上好多患者確診時已屬晚期，所以手術困難，5年存活率一直偏低，臨床上符合手術標準嘅患者唔到20%。
事實上，胰臟癌好常見會包繞住腸繫膜上動靜脈、腹腔幹動脈等重要血管，為外科手術帶嚟巨大風險與挑戰。傳統治療方法如放療、化療，但胰臟癌對呢啲治療反應唔好，患者預後都唔理想。
至於射頻消融、微波消融、冷凍消融呢啲靠溫度消滅腫瘤嘅物理消融方式，會對組織造成「無選擇性」嘅破壞，好容易傷到周邊重要器官，導致嚴重併發症。
呢個時候，一種「唔產生熱量」、「唔受熱沉效應影響」、「有選擇性」、「唔破壞重要組織」嘅嶄新消融技術——納米刀（NanoKnife）就應運而生。
納米刀學名係「不可逆電穿孔技術（IRE）」，透過高壓電場發出微秒級電脈衝，喺腫瘤細胞膜上打出微細孔洞，誘導細胞壞死，從而達到治療腫瘤嘅效果。相比傳統手術，納米刀可以減少出血等風險，殺滅腫瘤細胞之餘，仲可以保留重要結構，做到「魚與熊掌兼得」。
△納米刀利用約3000伏特高壓短脈衝穿透腫瘤細胞膜，喺心電圖上可以清楚睇到電擊波。對於胰臟癌同肝門部肝癌都係非常有效嘅治療手段。
目前，關於納米刀治療胰臟癌嘅研究，例如Martin等報告顯示：200例患者中總存活期（OS）超過2年；國際多中心研究OS達30個月；亞洲多中心研究S1+IRE方案亦將OS延長至28.7個月以上。以上數據都表明納米刀對胰臟癌有延長壽命嘅潛力。中國國家衛生健康委亦已將呢項技術納入《胰臟癌診療指南2022》中，並獲多個指南及專家共識推薦使用。
△有位來自菲律賓嘅胰臟癌患者，喺當地做唔到手術，只能植入膽道支架，之後特登飛嚟中國搵我做納米刀治療。佢嘅腫瘤有5.3公分，位置喺胰頭部，結構複雜。我哋喺超聲聯合CT引導下，用移動式消融技術，成功完成納米刀消融。
除咗胰臟癌，納米刀對於靠近肝門區、膽管、膽囊、輸尿管等部位嘅腫瘤亦有明顯優勢。
肝門區腫瘤唔單止手術困難，傳統冷熱消融都難以施行，因為會損害肝門結構。但納米刀可以保留肝臟嘅血管、膽管、胰管同腸道結構，點解可以咁神奇？
因為納米刀唔靠熱效應，而係利用高頻高壓電穿孔原理，喺唔破壞組織結構情況下令腫瘤細胞凋亡，避免傳統熱消融造成熱傷害或治療唔徹底嘅風險。
意大利羅馬大學Anna教授等人針對「肝門部膽管癌」進行納米刀治療嘅文獻回顧與Meta分析，總共回顧627篇文章，最終篩選出6項納入定量分析。
研究結果顯示：納米刀結合化療平均存活期為25個月，胆道再通率達100%，大幅改善患者生活質素。即使研究有一定限制，但納米刀對無法切除肝門部膽管癌嘅生存期提升明顯。
而研究中亦引用我院一項同步化療+納米刀治療肝門部膽管癌嘅臨床論文，係國際上首個報導此同步療法。呢個方案唔單止有納米刀消融效果，仲可以發揮其電化學及電免疫作用，特別針對難以根治性消融嘅腫瘤產生協同效應，效果類似同步放化療，更安全、更有效。
例如前列腺腫瘤，傳統消融方法容易損傷神經，導致性功能障礙。但納米刀唔會損傷神經或管道，對此類患者有不可替代嘅作用。
納米刀消融技術為位於高風險部位、無法手術切除嘅惡性腫瘤，提供咗一種嶄新而有效嘅局部治療方案。